SYUDAD SANG ILOILO – Maisog nga ginsabat ni Vice President Leni Robredo ang panibag-o nga patutsada ni Presidente Rodrigo Duterte batok sa bise presidente tuhoy sa reaksyon sini sa kontrobersyal nga Manila Bay white sand project. Nag-trending sa social media ang pagpakamalaot sang pumuluyo batok sa proyekto nga kapin 400 (kwatro sientos milyones) ang balor nga maayo kuntani gingamit kontra sa COVID-19 pandemya.
Sa pasaring ni Duterte sa recorded weekly speech sini, nga may ubrahon man ukon wala ang iya administrasyon, madamo sa gihapon reklamo si Robredo. Dugang pa niya nga indi dapat pagpatihan ang ginahambal ni Robredo kag ginhangkat sini ang bise presidente nga mag-spray sang pesticide kung gusto gid sini nga matapna ang virus. Nagapanindugan gihapon si Duterte nga wala na ini sang maubra agud matapna ang virus gani mahulat na lang siya sang bakuna.
Imbes nga magkunol, ginsabat ni Robredo sang iya proposal kon paano dapat tigayunon sang gobyerno ang husto ang pag-atubsang sang pandemya. Suno sa bise presidente, una, dapat tapnaon ang pandemya sa medical kag non-medical nga mga pamaagi. Ikaduha, dapat magdihon sang plano ang gobyerno kon paano mapangibabawan ang mga humanitarian emergencies kaangay sang kaimulon, gutom, mental distress kag kawad-on sang palamugnan nga gintuga sang pandemya. Ikatatlo, dapat maghatag sang prayoridad sang gobyerno ilabi na sa mga apektado sang pandemya kag ikaapat, dapat liwat nga pasikaron kag pasanyugon liwat ang ekonomiya nga sustenable, mabakod, kag ang tanan, ilabi ang imol, kabahin sang dako nga makabenepisyo.
Dugang pa ni Robredo nga indi matapna ang pandemya sa pagspray sang pesticide.
Madumduman nga sang Agosto, nagpahayag si Robredo nga nadulaan na sang pagsalig ang mga Pilipino sa gobyerno ilabi na gid sa kung paano sini ginaatubang ang problema sang pandemya.
Gin-akusahan naman ni Duterte nga gina gatungan pa gid ni Robredo ang kaakig sang pumuluyo batuk sa iya administrasyon apang para kay Robredo, may ara siya sang kinamatarong nga maghatag sang kritisismo kay parte ina sang iya pagkaPilipino kag kabahin ini sa pagpalakat sang pungsod./PT
