ILOILO – Wala na sang liwan pa nga barasulon sa mga pagbaha sa Cagayan kag Isabela sining damlag lang kundi ang National Irrigation Administration kag ang National Power Corporation nga nagpatindog sang Magat dam, ini suno sa pahayag sang Jalaur River for the People’s Movement ukon JRPM.
Suno sa grupo, apesar sang mabaskog nga pag-ulan, kon wala sang dam kag wala natipon ang tubig kag gulpyada nga ginbuksan ang gate, indi kuntani amo na kalala sang pagbaha sa nailawud nga bahin sang dam.
Madumduman nga nagsunod-sunod ang mga bagyo kag sige ang pagkolekta sang dam sang tubig para gamiton sa pagtuga sang kuryente paagi sa gulpi nga pagbukas sang mga gate rason sang pagragasa sang tubig nga nagtuga sang mga pagbaha.
Suno sa NDRRMC, naglab-ot sa 10 bilyones pesos ang kahalitan sang Bagyong Ulysses sining tinalikdan nga semana.
Para sa JRPM, dapat sukton ang NIA kag ang gobyerno sa kahalitan sini sa pumuluyo bangud sa padayon nga pagpatindog kag pag-operate sang mga dalagkuan nga dam. Dapat na suno sa grupo nga untaton sang gobyerno ang pagpatindog sang mga dalagkuan nga dam nga nagahalit sa mga komunidad sang Tumandok nga ginapatindugan sini kag sa mga pumuluyo sa nailawod nga bahin sang dam labi pa subong nga napamatud-an ang daku nga halit sini sa katawhan.
Pila sa mga mega dam nga ginapatindog ukon igapatindog sang gobyerno amo ang Chico Dam sa Mountain Province, Kaliwa Dam sa Quezon, Balog-balog Dam sa Tarlac kag Jalaur Dam sa probinsya sang Iloilo.
Sa bilog nga kalibutan dugang sang JRPM, ginapauntat na ang pagpatindog sang mga dalagkuan nga dam ukon ginaguba ang mga ini bangud sang halit sini sa mga komunidad kag kapalibutan kag wala man nalab-ot ang katuyuan sini.
Gani panawagan sang JRPM, dapat na untaton ang pagpatindog sang Jalaur dam sa Calinog nga mangin tunaan sang grabe nga pagbaha sa Calinog, San Enrique, Duenas, Dingle, Barotac Nuevo, Pototan, Dumangas, Zarraga, Leganes kag syudad sang Passi kag Iloilo.
Madumduman nga apesar yari sa ilawod nga bahin sang Jalaur nga suba ang Moroboro dam kag manubo ini, nagatuga ini gihapon sang pagbaha sa 9 ka mga banwa kag syudad sang Passi kag Iloilo./PT
