ILOILO – Mabaskog nga ginakundena sang Karapatan Alliance Philippines ang iligal nga pag-aresto sa 32 anyos nga si Amanda Echanis, isa ka organisador sang Amihan, organisasyon sang kababainhan nga mangunguma.

Iligal nga ginsulod sang mga katapo sang Philippine National Police (PNP), Criminal Investigation and Detention Group (CIDG), kag Armed Forces of the Philippines (AFP) ang puluy-an ni Amanda sa Brgy. Carupian, Baggao, Cagayan kaagahon sang Disyembre 2.

Ginpasakaan si Echanis sang pato-pato nga kaso nga illegal possession of firearms, ammunitions, and explosives.

Upod ni Amanda ang iya isa ka bulan nga lapsag sang siya gindakop. Si Amanda ang bata sang anay National Democratic Front of the Philippines (NDFP) Consultant kag Anakpawis Chairperson nga si Randall “Ka Randy” Echanis nga gintortyur antes ginpatay sang mga ginapatihan ahente sang estado, apat ka bulan palang ang nagligad.

Nagpanawagan ang pamilya kag mga organisasyon nga ginapasakupan ni Amanda nga hilwayon siya kag ang iya anak sa mas madali nga panahon bilang tawhanon nga pagtratar sa mag-iloy.

Nagapati man ang mga abugado, abyan kag tagasuporta ni Amanda nga gin-tanom ang mga “ebidensya” nga ginpresentar sang mga ahente sang estado.

Suno sa Karapatan Cagayan Valley, madugay na nga ulubrahon sang mga suldado kag pulis ang pagtanom sang mga ebidensya agod pahipuson kag iligal nga arestohon ang mga nagapanawagan sang pagbag-o sa sosyudad.

Dugang sang National Network of Agrarian Reform Advocates – Youth (NNARA Youth), imbes nga sabton ni Duterte ang mga letihimo nga panawagan kag demokratiko nga interes sang pumuluyo kaangay sang kawad-on sang lupa sa mga mangunguma, kakulangon sang ayuda kag solusyong medical ilabi na sa panahon sang pandemya kag kalamidad, kag ang nagalala nga krisis sa ekonomiya sang pungsod, mas ginahatagan pa sini prayoridad ang pagpahipos sa mga indibidwal nga wala sang pagpangduha-duha nga nagabuyagyag sang kakulangan sang gobyerno para lang maproteheran ang iya makakaugalingon nga mga interes.

Sa katapusan, ginahangkat sang Amihan ang pinakamalapad nga kubay sang pumuluyo nga mag-upod sa panawagan nga hilwayon si Amanda, ang iya lapsag kag tanan nga political prisoners. Dugang sang grupo, ginapangatubang naton subong ang rurok sang imoralidad kag indi makatawo nga pagtrato sang gobyerno sa pumuluyo gani mas nagakadapat nga pamatukan ang ini nga pasista nga rehimen./PT