ILOILO – Gin-abswelto sang Metropolitan Trial Court sang Quezon City Branch 43 ang kaso nga paglapas sang Public Service Act batuk sa anay presidente sang Pinagkaisang Samahan ng Tsuper at Opereytor Nationwide ukon PISTON nga si George San Mateo sadtong Disyembre 7.
Si San Mateo ginpasakaan sang kaso sang Land Transportation Franchising and Regulatory Board ukon LTFRB angut sa pagpamuno sini sa ginhiwat nga pungsodnon nga transport strike sadtong tuig 2017. Ang nasambit nga strike ginlunsar sang mga drayber kag opereytors para pamatukan ang modernization program kag jeepney phaseout sang gobyerno.
Suno sa pahayag ni San Mateo, ang pagbasura sang iya kaso isa ka dako nga kadalag-an sa kinamatarung sang mga PUV drivers, magagmay nga opereytors, kag sang bilog nga pumuluyo nga nagahugpong kag militante nga nagalunsar sang mga protesta para ipanawagan ang ila lehitimo nga mga demanda.
Suno sa PISTON, libo-libo nga mga PUV drivers kag opereytors ang maapektuhan kung bug-os na nga mapatuman ang jeepney phaseout bangud sang tama kamahal nga presyo sang mga modernized jeepneys.
“Padayon sa gihapon kita nga magabato!” Ini ang hambal ni San Mateo sa tunga sang red-tagging sa mga miyembro sang PISTON. Nagpahayag man si San Mateo nga magapadayon ini sa paghulag kontra sa jeepney phaseout kag para suportahan ang paghimakas sang nagkalain-lain nga sektor.
Matandaan man nga sadtong Nobyembre 26, naghiwat sang protesta ang PISTON sa opisina sang LTFRB para ipanawagan ang Php 6,500 nga ayuda para sa mga draybers kag magagmay nga opereytors. Ang ini nga ayuda nakabutang sa Bayanihan to Recover as One Act ukon Bayanihan II./PT
