ILOILO – Nagpasaka sang impeachment complaint sa House of Representatives si Edwin Cordevilla, secretary general sang Filipino League of Advocates for Good Governance, batuk kay Associate Justice Marvic Leonen sadtong Disyembre 7.
Suno sa tag-reklamo, wala nakapasa si Leonen sang iya Statement of Assets, Liabilities and Networth (SALN) samtang nagatudlo ini sang abogasya sa University of the Philippines. Dugang pa ni Cordevilla, nagbayolar si Leonen sang Konstitusyon bangud sang kapalpakan sini sa pagresolba sang indi magnubo sa 37 ka mga kaso sa sulod sang 24 ka bulan nga gintalana sang Konstitusyon.
Ginarepresenta si Cordevilla ni Atty. Lary Gadon, nga amo man ang nagpasaka sang impeachment complaint batuk kay Chief Justice Maria Lourdes Sereno sadtong tuig 2017 (dos mil disi siete). Ang nasambit nga reklamo batuk kay Leonen ang gin-indorso man ni Ilocos Norte 2nd District Representative Angelo Marcos-Barba nga paka-isa naman ni Bongbong Marcos.
Sang damlag lang ginbalibaran sang Presidential Electoral Tribunal (PET) ang petisyon ni Marcos nga pahalinon si Leonen sa kaso sang electoral protest nga ginpasaka sini batuk sa nagda-og nga Bise Presidente nga si Leni Robredo. Si Leonen amo ang Justice-in-charge sa nasambit nga electoral protest.
Suno sa Bagong Alyansang Makabayan (BAYAN), ang impeachment complaint nga ginpasaka batuk kay Leonen, isa ka kalkulado nga lihok ni Marcos para mapilitan ini nga maghalin ukon maghimo sang tikang pabor sa electoral protest batuk kay Robredo.
Apesar sini, nagabaha naman ang suporta para kay Leonen halin sa mga kaupod sini nga abogado. Suno sa ginpagwa nga pahayag sang FEU Institute of Law, nagapati kag sigurado sila nga si Leonen isa ka halangdon, maalam, responsable, kag indi korap nga mahistrado sang Korte Suprema. Nagpagwa man sang ila suporta ang masobra 200 ka mga abugado kag manunudlo sang abogasya halin sa bug-os nga Pilipinas, kag nanawagan ang mga ini nga ibasura ang nasambit nga reklamo bangud wala ini sang basehan.
Suno naman sa presidente sang National Union of People’s Lawyers nga si Edre Olalia, sa sini nga kahimtangan, kinahanglan naton sang oposisyon kag may kina-alam nga independiente sa aton hudikatura, nga amo naman ang pilit ginapahalin sang mga “masabad” nga tag-reklamo.
Ginpa-iway sang House of Representatives ang pagtalakay sang impeachment complaint batuk kay Leonen bangud sang kawad-on sang oras. Sang nagligad nga semana, nagpahayag si Deputy Speaker Rufus Rodriguez, ang vice chairman sang justice committee, nga wala pa sila sang oras para istoryahan ang nasambit nga reklamo bangud may mas importante pa sila nga paga-istoryahan antes magtakop ang sesyon sini nga tuig. Maga-balik ang sesyon sa sunod nga tuig, Enero 202./PT
