Browsing Category

Dampig Katarungan

MGA PROGRESIBO NGA GRUPO, GIN-ATUBANG ANG MGA ALEGASYON SA ILA SA SENATE HEARING TUHOY SA RED-TAGGING

SYUDAD SANG ILOILO – Gin-atubang sang mga progresibo nga grupo ang mga opisyal sang militar kag katapo sang National Task Force to End Local Communist Armed Conflict ukon NTF-ELCAC kag ila mga witnesses sa ikaduha nga session sang senate hearing tuhoy sa issue sag red-tagging sang mga personalidad kag organisasyon nga ginahimo sang militar.

Gintambungan sang Makabayan Bloc ang nasambit nga senate hearing sa pagpanguna nanday Bayan Muna Representative Carlos Zarate kag Kabataan Partylist Representative Sarah Elago. Nagtambong man sanday anay Bayan Muna Representative Atty. Neri Colmenares kag Teddy Casino. Yara man ang mga representante sang Karapatan, Gabrilea, mga himata sang ginpamatay sa idalum sang rehimen ni Duterte kag subong man si Sr. Mary John Mananzan.

Sa pihak naman nga kampo amo sanday National Security Adviser Hermogenes Esperon Jr. kag pila ka mga opisyal sang NTF-ELCAC nga nagpanginwala nga may kahilabtanan sila sa red-tagging.

Nagpa-andam si Casino nga ang red-tagging nga gina-ubra sang mga militar kag kapulisan ang embukada sang mas malala nga crackdown batuk sa mga kritiko sang gobyerno gamit ang Anti-Terror Law.

Dugang pa ni Casino, ang ini nga mga asud-asud nga propaganda sa red-tagging ang may tinutuyo nga buyukon ang opinion publiko batuk sa mga progresibo bilang preparasyon sa pagdesignar ukon pagproscribe sa ila bilang mga terrorista sa ngalan sang Anti-Terror Law kag ang lubos na nga pagtukod ni Duterte sang iya tiraniko nga paghari paagi sa pagkriminalisa sang nagapamatuk sa iya indi maayo nga pagdumala.

Gin-athag naman ni Casino nga indi sila kabahin sang underground nga kahublagan. Suno kay Casino, wala sila sang ginahimo nga illegal. Ginhangkat niya liwat ang NTF-ELCAC nga kung may ara sila sang pamatuod dapat nagderetso sila sa korte.

Apang wala man sang plano ang NTF-ELCAC nga dal-on ini sa korte suno kay Casino bangud nakahibalo ang mga militar nga indi sila mangin madinalag-on basi mismo sa panugdaon sang ila star witness nga indi makatindog ang ila akusasyon sa korte gani ginagamit nila ang senado para iduso ang trial by publicity batok sa mga progresibo nga grupo.

Para naman ipakita nga wala sila sang ginahimo nga malain, ginpresentar sang mga progresibo nga grupo kag Makabayan Bloc ang ila nga mga kontribusyon kag hinimuan agud magduso sang kaayuhan sa katilingban.

Pila sa mga layi nga napasar nga principal ginduso sang Makabayan amo ang Universal Free Higher Education Act, Free Irrigation Services Act of 2018, Reorganizing and Strengthening the Public Attorney’s Office Act, Anti-Trafficking in Persons Act, Free Public Wi-Fi Law, National Student’s Day, Expanded maternity leave law, Kalusugan at Nutrisyon ng Mag-Nanay Act, Filipino Sign Language Act kag madamo pa.

Nag-apelar si Casino sa publiko kag sa senado nga untaton na kag imbestigahan ang madata nga kaso sang red-tagging bangud nga madamo na ini sang ginkuha nga kabuhi kaangay nanday Randal Echanis, Zara Alvarez, Jory Porquia, Atty. Ben Ramos kag madamo pa./PT

MGA AKTIBISTA SA PANAY PADAYON ANG PAGTIPON KAG PAGHATAG SANG AYUDA PARA SA MGA BIKTIMA SANG BAGYO

SYUDAD SANG ILOILO – Kon may ara man sang ginasakuan subong ang mga aktibista sa Panay, isa diri ang pagkalap sang mga donasyon para sa mga biktima sang bagyo sang tinalikdan nga semana. Isa lang ini sa mga ginasakuan sang mga aktibista sa tunga sang wala-tuo nga pagpakamalaut kag pagredtag sa ila sang estado sa pagpanguna sang NTF-ELCAC kag mga ido buang nila nga mga state witness.

Sa pagpanguna sang Tulong Kabataan Western Visayas kag Bangon Bayan sang Bayan Panay, masobra 50 mil ang cash donations nga natipon sang mga grupo. Wala labot dira ang mga kinarton sang pagkaon, gatas, face masks, kag saku-sako sang panapton nga naghalin sa nagkalain-lain nga distrito kag syudad sang Iloilo. Talalupangdon man ang dagyawanay sang mga pamatan-on kag estudyante sa pagkolekta sang donasyon sa ila tagsa-tagsa ka mga distrito, pagrepak, kag karga-diskarga sang mga donasyon.

Sang nagligad nga semana, Nobyembre 20, nagpartner ang mga grupo sa PassFast Philippines Delivery Services nga nagtunghol sang libre nga transportasyon sang mga donasyon direkta mismo sa mga biktima sa Cagayan sa pagpatigayon sang partner organization sang Tulong Kabataan.

Suno kay Frena Cerdanio sang Tulong Kabataan sa West Visayas State University, napamatud-an nila nga yabi ang organisado nga paghulag sang estudyante kag pamatan-on agud makalunsar sang kaangay nga kampanya nga napahulag kag naisa ang mga donors para makahatag sang bulig sa mga biktima sang bagyo.

Nagapati si Cerdanio nga indi lang ini ang kahigayunan nga napakita sang mga aktibista ang kahustuhan sang ila mga kawsa kag kampanya nga nagahatag sang direkta nga benepisyo sa mga sector nga ginadaug-daug kag mga biktima sang criminal nga kapabayaan sang estado.

Sa Aklan kag Roxas, nag-umpisa naman ang pagkalap sang donasyon sang mga progresibo nga grupo apesar nga sila apektado man sang tuigan nga kalamidad tuga sang bagyo.

Para sa mga aktibista, indi maguba sang pagpakamalaut kag redtagging sang gobyerno ang ila commitment sa pagserbi sa pumuluyo. Lubos ang pagsalig sang mga progresibo nga grupo sa ikasarang sang pumuluyo nga bag-uhon ang ila mapiot nga kahimtangan kag ipundar ang makipumuluyo, makibanwahanon kag nagasalig-nga-kaugalingon nga pangginobyerno nga hilway sa korapsyon, padrino nga sistema, kag garuk nga pagdumalahan sa palaabuton./PT

MGA PAMATAN-ON, NAGLUNSAR SANG PROTESTA BATUK SA KRIMINAL NGA KAPABAYAAN NI DUTERTE!

SYUDAD SANG ILOILO – Ginpuno sang nga pamatan-on ang dalanon malapit sa Ateneo de Manila University Gate 2.5 sang Nobyembre 17, kadungan sang International Students Day, agud pangunahan ang pagpanukot sang kriminal nga kapabayaan ni Duterte sa pag-atubang sang mga kalamidad subong man ang palpak nga pag-atubang sini sa pandemya.

Nag-umpisa ang ini nga Youth Strike matapos ginpa guwa sang mga bumulutho sang Ateneo ang isa ka petisyon nga nagapanawagan sang malaparan nga strike sang nga estudyante sa diin nagpanawagan sila nga indi magpasa sang nga requirements sa eskwelahan mientras indi masabat sang gobyerno nasyunal ang panawagan nila sa maayo nga pagresponde sa mga kalamidad kag sang pandemya.

Suno sa petisyon nila, indi nila pwede unahon ang ulubrahon sa eskwelahan samtang ang ila nga mga kasimanwa ang naga-antus bangud sang kapabayaan sang yara sa poder.

Naglanog ang ini nga petisyon kag ginsundan man ini sang kaangay nga nga panawagan sang mga estudyante sang UP, PUP, UST, kag DLSU.

Supportado naman sang mga manunudlo sang sini nga mga unibersidad ang panawagan sang ila mga estudyante. Gin-updan man ini sang nga manunudlo sa basehan nga edukasyon sa pagpanguna sang Alliance of Concerned Teachers.

Matapos sang lapnagon nga protesta sang na-irita si Duterte kag nagpamahug nga indi niya pagpunduhan ang eskwelahan kag ginredtag man niya ini.

Apang kaangay sang kalayo nga ginbubuan sang gas, ang ini nga reaksyon ni Duterte ang nagdugang pa gid sang ka init sang pumuluyo kag ginsabat pa gid ini sang madamuan kag lapnagon nga protesta sa bilog nga pungsod.

Ang ini nga pagpamahug ni Duterte ang ginsabat sang pamatan-on sa isa ka pungsodnon nga koordinado nga protesta para ipawagan ang pagpasabat sa iya kriminal nga kapabayaan kag pagpatalsik sa iya.

Sa Panay naglunsar man sang mga protesta ang pamatan-on sa siyudad sang Iloilo, Roxas kag sa banwa sang Kalibo sa Aklan. Ila naman ginpahayag nga ang kapabayaan ni Duterte ang nagpalala sang kahimtangan sang nga Pilipinhon ilabi na ang mga nahalitan sang Bagyong Rolly kag Ulysses sa Luzon.

Gin-updan kag ginsuportahan man sang nagkalain-lain nga sektor ang ini nga protesta nga ginapangunahan sang mga pamatan-on./PT

Lider Mangunguma sa Quezon, Ginpatay sa Tunga sang Kalamidad

SYUDAD SANG ILOILO – Isa ka lider sang mga mangunguma sa niyog sa Quezon ang gintiro patay, sadtong Nobyembre 14, sang wala makilal-an nga mga suspetsado.

Ang lider mangunguma ang ginkilala kay Armando Buisan, chairperson sang General Luna tsapter sang Coco Levy Ibalik sa Amin ukon CLAIM. Sandig sa report sang Karapatan Quezon, nakit-an ang iya bangkay sa Santa Maria, Catanuan, 24 kilometro ang kalayuan sa iya puluy-an.

Si Buisan, 60 anyos, ang manugkopras kag residente sang Luyahan, Brgy Magsaysay, General Luna, Quezon. Ginpakigbato niya ang kinamatarung sang mga magniniyog sa sulod sang tatlo ka dekada. Nangin subject siya sa serye sang mga harassment kag sadtong 2019, ginpresentar siya sang mga militar bilang “rebel surrenderee” upod ang 39 ka iban pa.

Suno kay Orly Marcellana, secretary-general sang Katipunan ng Samahan ng Magbubukid sa Timog Katagalugan (KASAMA-TK), ang panawagan sang mga magniniyog para sa mataas nga presyo sang kopras, lukad, kag ayuda sa tion sang sunod-sunod nga bagyo kag pandemya ang ginsabat sang pagpamatay sang estado.

Ginpakamalaut naman sang Karapatan Timog Katagalugan ang bag-o na naman nga serye sang extra-judicial killing sa panahon sang pandemya. Suno sa grupo, nagalala ang human rights violations kag nagpadayon ang desperado nga pagpamatay sang estado bisan pa gin-igo sang kalamidad ang probinsiya.

Ang General Luna ang parte sang Bondoc Peninsula sa Quezon. Tatlo ka sunod-sunod nga bagyo ang nag-agi sa lugar sa sulod lang sang isa ka bulan nga nagtuga sang malaparan nga pagkaguba sang propyedad kag pagbaha.

Suno sa reports sang mga progresibo nga organisasyon, nagapadayon ang mga yunit sang pulis kag militar, ilabi na gid ang AFP 8th Infantry Battalion, sa pagharas sang mga mangunguma kag pagpatu-pato nga mga miyembro ang mga ini sang New People’s Army (NPA) bisan pa sa tunga sang mga kalamidad nga nag-agi sa probinsya.

Sa katapusan, padayon nga nagapanawagan sang hustisya ang KASAMA-TK sa kamatayon ni Armando Buisan./PT

MILITAR, NAGALUTO SANG MGA PAGPATALANG KAG KABUTIGAN AGUD IPITON KAG KASUHAN ANG MGA AKTIBISTA

SYUDAD SANG ILOILO – Target subong sang 3rd ID Philippine Army nga kasuhan ang mga aktibista sa pagpati nga mga terorista sila sigon sa panuaron ni Jeffrey Celiz kag pila kuno ka mga rebel returnees.

Sa pahayag ni Major Cenon Pancito, spokesperson sang 3rd ID sa interbyu sa isa ka lokal radio station, may ginahanda sila nga mga affidavits nga kuno nagapamatuod sang kaangtanan sang mga aktibista nga yari sa syudad sa CPP-NPA-NDF. Madumduman nga ang ini nga kabutigan kag pagpatalang ang ginsabwag ni Celiz sa senate hearing sang tinalikdan nga bulan para salbaron ang iya kaugalingon matapos ginpangalanan ni Duterte nga imbolbado ini sa iligal nga droga.

Mabaskog nga ginapakamalaut sang Bayan Panay ang ini nga padihot sang militar sa diin klaro nga mangin mitsa ini sang sunod-sunod nga iligal nga aresto, pagpreso, torture kag ang malala ang pagpatay sa mga aktibista nga ang solo nga armas amo ang placard, megaphone kag ila tingog sa dalanon.

Ang ini nga tikang sang militar, dugang sang Bayan, athag nga pagkriminalisa sang kinamatarung sa pagpalayag kag pag-organisa nga napagkit sa aton konstitusyon.

Dugang sang Bayan nga ini na ang epekto sang pagpasar sang Anti-Terror Law sa diin ang simple nga mga pagsaway sa gobyerno mahimo na mangin krimen sa mata sang estado kag sang militar.

Nagapati ang Bayan nga ang paglagas sang militar sa mga aktibista sa legal nga organisasyon patimaan nga wala sang ikasarang ang militar nga lagson ang ila armado nga kontra sa kabukiran gani ang mga indi-armado, sibilyan kag oposisyon ang ila subong ginapurterya sa pagpati nga matapna ang insurhensya sa pungsod.

Para sa Bayan, ang paghatag sang duta sa mga mangunguma, nagakaigo nga sweldo kag pag-untat sang kontratwalisasyon sa mga mamumugon, pagtib-ong sang aton soberanya batuk sa dumuluong, pagtapna sang korapsyon, kag iban pa, ang solusyon kag indi ang paglagas sa pumuluyo nga nagasaway sa administrasyon./PT

REDTAGGING SA MGA ESKWELAHAN, GINKUNDENA SANG MGA PROGRESIBO

SYUDAD SANG ILOILO – Ginkundena sang Kabataan Partylist – Panay ang panibag-o nga redtagging sang militar sa mga eskwelahan sa Iloilo.

Sa pahayag sang Philippine Army, ila daw ginamonitor ang mga estudyante sa mga eskwelahan nga ginsambit ni “Ka Eric” ukon mas kilala nga Jeffrey Celiz kung sa diin may mga progresibo nga grupo nga may kaangtanan sa CPP-NPA-NDF.

Ginpahayag sang grupo nga ang pag redtag sa ila mga miembro kag mga estudyante ang naga butang sa katalagman sang ila seguridad bangod antes ginpatay sanday Jory Porquia kag Zara Alvarez, sila ang ginredtag kag gin monitor man sang mga ahente sang estado.

Dugang sang grupo nga ang pagredtag sa mga kritikal mga organisasyon sang estudyante ang nagahatag sang lisensya sa pag atake sa sini nga mga organisasyon, ila mga lider kag mga miembro. Ginahatagan man sini sang ligwa agud ma-militarisa ang mga eskwelahan kung sa diin may ara sang mga organisasyon nga kritikal sa gobyerno. Ini magaresulta sa pag-ipit sa mga organisasyon kag pagbusal sa mga kritiko nga athag nga bayolasyon sa duna nga kinamatarung sang mga estudyante sa pagpalayag kag organisasyon.

Luyag man sang grupo nga ipahanumdom sa militar nga ang pagmonitor nila sa mga eskwelahan ang naga bayolar sang layi nga RA 7610 kung sa diin gina kabig ang mga eskwelahan nga mga zones of peace kag gina dumilian ang presensya sang mga armado nga hubon.

Ginpakamalaut man sang Kabataan Partylist ang redtagging nga natabo sa NSTP program sang West Visayas State University – Pototan Campus kung diin gin redtag nila ang MAKABAYAN Bloc nga mga “legal fronts” kuno sang CPP-NPA-NDF.

Dugang sang grupo nga ang Makabayan Bloc, kung diin kabahin diri ang Kabataan Partylist, ang nagapakigbato sang kinamatarong sang pumuluyo para sa edukasyon, mga basehan nga serbisyo sosyal, trabaho kag insakto nga sweldo, kag matuod nga repormang agraryo. Dugang sang grupo nga ang pagdepensa kag pakigbato sang kinamatarong sang pumuluyo ang indi krimen.

Santo sa Section 18, numero 1, sang Article 3 Bill of Rights sang 1987 Constitution, indi dapat mapreso ang isa ka tawo bangud lang sang iya political nga pagpati kag handum nga mangin hilway sa pagpamigos kag pagpanghimulos ang sosyodad kag may pag-alalangay. Gani nanawagan ang Kabataan Partylist kag iban pa nga mga progresibo nga organisasyon sang mga pamatan-on nga untaton ang redtagging kag indi pagpahanugotan nga gamiton ang mga buluthoan nga avenue sa pag redtag, kundi sa pag hulma sang mga kritikal nga paminsaron.

Ginhangkat man sang grupo nga imbes i-monitor sang Philippine Army ang mga buluthoan, mas maayo kung didto sila ma monitor sa West Philippine Sea nga padayon gina atake sang mga dumuluong nga pungsod./PT

MAMAMAHAYAG, GINPATAY SA PANGASINAN

SYUDAD SANG ILOILO – Isa naman ka mamamahayag ang ginpatay sang wala pa makilal-an nga mga suspetsado sadtong Nobyember 10, alas 6:30 sang aga sa Villasis, Pangasinan. Ang biktima ang ginkilala kay Virgilio ‘Vir’ Maganes, isa ka mamamahayag kag nagasulat sa lokal nga pahayagan nga Northern Watch kag komentarista sa lokal nga radio station nga DWPR. Ang biktima ang gintiro samtang nagapasulod sa ila balay sa Sitio Licsab, Villasis, Pangasinan.

Si Maganes ang nag-angkon sang pilas sa ulo kag pila pa sa iya kalawasan nga nagresulta sang gilayon sini nga kamatayon. Narecover man sa crime scene ang 6 ka empty shells sang caliber 45 pistol.

Suno sa National Union of Journalist in the Philippines ukon NUJP, ini ang ikaduha na nga tion nga gin atake si Maganes. Sadtong Nobyembre 8, 2016, nakaluwas si Maganes sa pagpangluthang sang riding-in-tandem samtang nagapakadto ini sa iya trabaho sa Dagupan City.

Si Maganes ang ika-18 ka mamamahayag nga ginpatay sa idalum ni Duterte kag ika-190 humalin sadtong 1986. Ini ang miyembro man sang NUJP.

Sadtong 2018, ginkabig sang International Federation of Journalist nga pinakadelikado nga pungsod sa Southeast Asia para sa mga journalist ang pungsod Pilipinas.

Si Maganes ang nangin komentarista sa mga blocked-time programs sa nagkalain-lain nga lokal nga radio stations nga nakapokus sa isyu pulitika. Dugang sang grupo nga wala nahatagan sang resolusyon ang kaso ni Maganes sadtong 2016.

Ang pagpatay kay Maganes ang natabo semana matapos ginkomemorar ang International Day to End Impunity for Crime Against Journalist sadtong Nobyembre 2. Suno sa NUJP ang pagpatay kay Maganes ang pamatuod sang walay unod nga pabugal sang gubyerno nga buhi ang press freedom sa pungsod.

Nagapati naman ang College Editors Guild of the Philipines nga ang pagpatay kay Maganes ang parte sang kampanya sang administrasyong Duterte batuk sa mga kritiko sini. Suno pa sa grupo, bag-o oa man ang krisis sa ekonomiya kag ikaayong lawas nga dala sang Covid-19 pandemic, madasig ang administrasyon sa pagratsada sa tikang kontra-insurhensiya kag paglagas sa mga ginakabig sini nga kritiko imbes nga sabton ang gilayon nga kinahanglan sang pumuluyo.

Nagpanawagan naman ang nagkalain nga grupo kag organisasyo sang gilayon nga hustisya para kay Maganes kag sa tanan nga mamamahayag nga biktima sang pagpamatay kag para sa matuod-tuod nga kahilwayan kag freedom of the press and expression sa pungsod./PT

MAKABAYAN BLOC, WALA GINTAMBONGAN ANG SENATE HEARING ANGOT SA REDTAGGING

SYUDAD SANG ILOILO – Wala magtambong ang Makabayan Bloc sa senate hearing nga ginpatigayon ang senate committee on National Defense and Security nga ginapamunoan ni Sen. Ping Lacson angot sa mainit nga isyu sang redtagging ni Gen. Antonio Parlade sa mga aktibista, kritiko kag mga artista.

Sa ginpadala nga sulat sang Makabayan Bloc kay Senador Lacson, ila ginpangabay nga indi kuntani magpagamit ang senado agud makapangredtag pa gid ang militar sa mga progresibo nga organisasyon bangod ginabutang sini sa katalagman ang kabuhi sang mga lider kag miembro.

Nagapati ang Makabayan Bloc kaangay lang ini sang nagligad tuig nga senate hearing sa diin gin-alegar nang-kidnap sanday Atty. Neri Colmenares, Congresswoman Sarah Elago kag pila pa ka mga progresibo nga indibidwal sang mga menor de edad. Gindismiss sang Department of Justice ang kaso nga kidnapping sa mga nahinambitan nga lider sang progresibo nga grupo bangud wala may nakita nga ebidensya nga nagapamatuod nga konektado ang mga ini sa CPP-NPA-NDF.

Para kay Kabataan Partylist Rep. Sarah Elago, gingamit lang nila liwat ang senado agud magpatuhaw sang mga peke nga surrenderees agud liwaton lang ang mga kabutigan sang NTF-ELCAC kag militar.

Dugang ni Rep. Elago, mas may kabilinggan kon ang gintalakay nga isyu sang senado may kaangtanan sa pandemya, krisis sa ekonomiya kag ang kahalitan sang Bagyong Rolly.

Isa sa rason kon ngaa wala nagtambong sa senate hearing ang Makabayan bloc bangud ginpalabi nila ang mga donation kag relief efforts para sa mga biktima sang bagyo.

Nagpanawagan ang Makabayan Bloc nga untaton na ang redtagging bangud ginagamit lang ini sang militar kag NTF-ELCAC agud mahatagan basehan ang ila pagpang-atake sa hanay sang mga progresibo. Ginhangkat man sang Makabayan Bloc ang administrasyon nga magtutok sa mas dalagkuan nga isyu nga gina-atubang sang atong pungsod./PT

Bagyong Rolly Nagbilin sang Daku nga Kahalitan! #NasaanAngPangulo Nagtrending sa Social Media

SYUDAD SANG ILOILO – Daku nga kahalitan sa imprastruktura kag agrikultura ang ginbilin sang Bagyong Rolly sang ini ang naglaslas sadtong Nobyembre 1 sa pungsod. Ginakabig nga ara sa super typhoon category nga may kabaskugon sang hangin nga 225 kilometro per ora kag pagmadlos nga naglab-ot sa 310 kilometro per ora, ang bagyong Rolly ang ginakabig nga pinakamabaskog nga bagyo nga nag-agi sa pungsod subong nga 2020.

Nagbilin si Bagyong Rolly sang kabilugan nga 22 ka patay, 19 diri ang narekord sa Bicol Region kung sa diin pinakamalala ang epekto sang bagyo suno sa National Disaster Risk Reduction and Management Council ukon NDRRMC sa ulihi sini nga tally sadtong Nobyembre 6. Dugang sag NDRRMC, nagbilin pa gid sang P11 bilyones nga kahalitan ang bagyo kung sa diin P8.4 bilyones sini ang halit sa imprastruktura kag P2.9 bilyones naman sa sektor sang agrikultura. Dugang diri apektado man sang bagyong Rolly ang may kabilugan nga 230,834 ka pamilya ukon 906,146 ka indibidwal sa 3,586 ka barangay. May ara naman 44,033 ka pamalay ang nagkalaguba sa Bicol Region, MIMAROPA kag Cordillera Administrative Region.

Nagtrending naman sa social media ang #NasaanAngPangulo matapos wala kitaa si Presidente Duterte sa labing una nga high-level public briefing angut kay Bagyong Rolly nga ginhiwat man mismo 5 ka oras matapos nga una nga naglandfall ang bagyo sa Bato, Catanduanes. Suno sa kay Sen. Bong Go, nagamonitor ang presidente sang bagyo sa iya hometown nga Davao City. Gintuhay sang mga netizens si Duterte sa kay anay Presidente Noynoy Aquino – nga bisan napuno sang kritisismo bangud sa palpak nga pagsabat sa epekto sang Bagyong Yolanda – ini ang naghatag sang briefing sa pumuluyo paagi sa televised speech gab-i antes mag-abot ang bagyong Yolanda.

Sa pihak nga bahin, ginpakamalaut naman sang Kilusang Magbubukid ng Pilipinas ang natabo nga senate hearing angut sa red-tagging sa pihak sang kalamidad nga ginaatubang sang pungsod. Suno sa grupo, tama ka insensitibo nanday Sen. Ping Lacson kag sang Senate Committee on National Defense nga iduso ang hearing angut sa red-tagging ni Gen. Parlade sa grupo nga Gabriela, pila ka artista kapareho nanday Angel Locsin, Liza Soberano kag Catriona Gray, kag mga progresibo nga partylist groups sa pihak nga nagaatubang ang pungsod, ilabi na ang mga Bicolano, sa malala nga epekto ni Bagyong Rolly. Dugang sang grupo nga uyang lamang ini sang kwarta sang pumuluyo.

Suno naman kay Bayan Muna Representative Carlos Zarate, mas gustuhon pa sini nga magkadto sa mga relief missions kag konsultasyon sang mga pumuluyo nga apektado sang bagyo kaysa magtambong sa nasambit nga kabutigan nga palagwaon.

Nagpanawagan naman si Zarate nga imbes nga pondohan ang red-tagging kag pagpalapta sang fake news sang NTF-ELCAC, mas maayo nga ihatag na lamang ang P19.1 bilyones nga pondo sini sa 2021 para sa mga biktima sang nagliligad nga bagyong Quinta kag Rolly. Dugang ni Zarate nga ang Php 19.1 bilyones nga ginapangayo sang NTF-ELCAC ang makasarang na makahuman sang indi manubo 38.2 milyones ka food packs para sa 2 ka milyon ka pumuluyo nga apektado sang kalamidad./PT

MGA ESTUDYANTE, MANUNUDLO KAG GINIKANAN NAG LUNSAR SANG BACK TO SCHOOL NETWORK

SYUDAD SANG ILOILO – Ginlunsar ang Back to School Network, isa ka alyansa sang mga estudyante, manunudlo, mga Sangguniang Kabataan kag mga Brgy Officials, mga Parents and Teachers Association, kag madamo pa, sadtong Oktubre 24, sa Nuestra Seniora MH Del Pilar Parish.

Gintambungan ang ini nga alliance launching sang nanarisari nga mga indibidwal halin sa mga estudyante, mga imol sa syudad, mga ginikanan nga pesante, mga manunudlo, kag mga baranggay officials.

Kabahin sang launching sang Back to School Network ang pagdiskusyon ni Phillippe Hinosa sang Rise for Education – Panay sa kahimtangan sang edukasyon sa pungsod kung sa diin ginpalala kag ginbuyagyag sang pandemya ang garuk nga sistema sang edukasyon, kabudlayan sang online kag modular learning, kag ang alternatibo nga ligtas balik eskwela sa mga kampus.

Gani bilang alternatibo, dapat hatagan sang mas dako nga badyet ang sektor sang edukasyon para matugonan ang mga resikitos para sa ligtas balik eskwela sa mga kampus, kaangay sang dugang nga classrooms, manunudlo, health personnel, sanitation areas kag mga bulong kag bitamina sa health clinics.

Ginsaysay man sang mga tumalambong ang ila nangin eksperyensya sa online kag modular learning.

Suno sa isa ka nanay halin sa hanay sang mga imol sa syudad, tuman ang iya kabalaka para saiya bata bangod indi man ini sya makabulig kay manubo ang iya antas sang edukasyon kag wala sya sang tiempo kay naga sako man ini saiya palamugnan.

Kag para naman sa mga ginikanan nga mangunguma,nagapati sila nga dako ang kinahanglan sang mga estudyante nga magbalik sa ila mga eskwelahan bangod mas dira sila sigurado nga maka tuon sang maayo kag bangod man budlay para sa mga manunudlo ang mag dul-ong sang mga modyuls sa mga layo nga kaumhan. Dugang man nila nga wala man sang maayo nga signal sa kaumhan para sa online learning kag bangod gamay ang kaso sang COVID-19 sa kaumhan, mahimo gid nga makahiwat sang pisikal nga klase sa mga kampus basta naga sunod lang sa minimum health protocols.

Nagbilin man si Councilor Candice Tupas sang Iloilo City sang iya mensahe nga apesar nga madamo ang nagapangabudlay, basta naga ugyon ang tagsa-tagsa ka mga Ilonggo kag naga duso sang ila kinamatarung sa edukasyon, malampuwasan gid nila ang ini nga kabudlay.

Temporaryo nga gintakpan ang programa paagi sa pagpakita sang mga tumalambong sang suporta sa simbolikal nga pag pirmahanay sang tarpauline para sa Ligtas Balik Eskwela.

Ginpromisa man sang BTS Network, nga indi mag untat ang kampanya sa ligtas na balik eskwela, kag magapadayon sila paagi sa ila mga nakahilera nga aktibidad kaangay sang massive information dissemination sa mga baranggay kag iban pa nga lokalidad, massive signature campaign, kag pag lobby sa mga local government units kag mga administrasyon sang mga unibersidad./PT