Browsing Tag

Jeffrey Celiz

MILITAR, NAGALUTO SANG MGA PAGPATALANG KAG KABUTIGAN AGUD IPITON KAG KASUHAN ANG MGA AKTIBISTA

SYUDAD SANG ILOILO – Target subong sang 3rd ID Philippine Army nga kasuhan ang mga aktibista sa pagpati nga mga terorista sila sigon sa panuaron ni Jeffrey Celiz kag pila kuno ka mga rebel returnees.

Sa pahayag ni Major Cenon Pancito, spokesperson sang 3rd ID sa interbyu sa isa ka lokal radio station, may ginahanda sila nga mga affidavits nga kuno nagapamatuod sang kaangtanan sang mga aktibista nga yari sa syudad sa CPP-NPA-NDF. Madumduman nga ang ini nga kabutigan kag pagpatalang ang ginsabwag ni Celiz sa senate hearing sang tinalikdan nga bulan para salbaron ang iya kaugalingon matapos ginpangalanan ni Duterte nga imbolbado ini sa iligal nga droga.

Mabaskog nga ginapakamalaut sang Bayan Panay ang ini nga padihot sang militar sa diin klaro nga mangin mitsa ini sang sunod-sunod nga iligal nga aresto, pagpreso, torture kag ang malala ang pagpatay sa mga aktibista nga ang solo nga armas amo ang placard, megaphone kag ila tingog sa dalanon.

Ang ini nga tikang sang militar, dugang sang Bayan, athag nga pagkriminalisa sang kinamatarung sa pagpalayag kag pag-organisa nga napagkit sa aton konstitusyon.

Dugang sang Bayan nga ini na ang epekto sang pagpasar sang Anti-Terror Law sa diin ang simple nga mga pagsaway sa gobyerno mahimo na mangin krimen sa mata sang estado kag sang militar.

Nagapati ang Bayan nga ang paglagas sang militar sa mga aktibista sa legal nga organisasyon patimaan nga wala sang ikasarang ang militar nga lagson ang ila armado nga kontra sa kabukiran gani ang mga indi-armado, sibilyan kag oposisyon ang ila subong ginapurterya sa pagpati nga matapna ang insurhensya sa pungsod.

Para sa Bayan, ang paghatag sang duta sa mga mangunguma, nagakaigo nga sweldo kag pag-untat sang kontratwalisasyon sa mga mamumugon, pagtib-ong sang aton soberanya batuk sa dumuluong, pagtapna sang korapsyon, kag iban pa, ang solusyon kag indi ang paglagas sa pumuluyo nga nagasaway sa administrasyon./PT

REDTAGGING SA MGA ESKWELAHAN, GINKUNDENA SANG MGA PROGRESIBO

SYUDAD SANG ILOILO – Ginkundena sang Kabataan Partylist – Panay ang panibag-o nga redtagging sang militar sa mga eskwelahan sa Iloilo.

Sa pahayag sang Philippine Army, ila daw ginamonitor ang mga estudyante sa mga eskwelahan nga ginsambit ni “Ka Eric” ukon mas kilala nga Jeffrey Celiz kung sa diin may mga progresibo nga grupo nga may kaangtanan sa CPP-NPA-NDF.

Ginpahayag sang grupo nga ang pag redtag sa ila mga miembro kag mga estudyante ang naga butang sa katalagman sang ila seguridad bangod antes ginpatay sanday Jory Porquia kag Zara Alvarez, sila ang ginredtag kag gin monitor man sang mga ahente sang estado.

Dugang sang grupo nga ang pagredtag sa mga kritikal mga organisasyon sang estudyante ang nagahatag sang lisensya sa pag atake sa sini nga mga organisasyon, ila mga lider kag mga miembro. Ginahatagan man sini sang ligwa agud ma-militarisa ang mga eskwelahan kung sa diin may ara sang mga organisasyon nga kritikal sa gobyerno. Ini magaresulta sa pag-ipit sa mga organisasyon kag pagbusal sa mga kritiko nga athag nga bayolasyon sa duna nga kinamatarung sang mga estudyante sa pagpalayag kag organisasyon.

Luyag man sang grupo nga ipahanumdom sa militar nga ang pagmonitor nila sa mga eskwelahan ang naga bayolar sang layi nga RA 7610 kung sa diin gina kabig ang mga eskwelahan nga mga zones of peace kag gina dumilian ang presensya sang mga armado nga hubon.

Ginpakamalaut man sang Kabataan Partylist ang redtagging nga natabo sa NSTP program sang West Visayas State University – Pototan Campus kung diin gin redtag nila ang MAKABAYAN Bloc nga mga “legal fronts” kuno sang CPP-NPA-NDF.

Dugang sang grupo nga ang Makabayan Bloc, kung diin kabahin diri ang Kabataan Partylist, ang nagapakigbato sang kinamatarong sang pumuluyo para sa edukasyon, mga basehan nga serbisyo sosyal, trabaho kag insakto nga sweldo, kag matuod nga repormang agraryo. Dugang sang grupo nga ang pagdepensa kag pakigbato sang kinamatarong sang pumuluyo ang indi krimen.

Santo sa Section 18, numero 1, sang Article 3 Bill of Rights sang 1987 Constitution, indi dapat mapreso ang isa ka tawo bangud lang sang iya political nga pagpati kag handum nga mangin hilway sa pagpamigos kag pagpanghimulos ang sosyodad kag may pag-alalangay. Gani nanawagan ang Kabataan Partylist kag iban pa nga mga progresibo nga organisasyon sang mga pamatan-on nga untaton ang redtagging kag indi pagpahanugotan nga gamiton ang mga buluthoan nga avenue sa pag redtag, kundi sa pag hulma sang mga kritikal nga paminsaron.

Ginhangkat man sang grupo nga imbes i-monitor sang Philippine Army ang mga buluthoan, mas maayo kung didto sila ma monitor sa West Philippine Sea nga padayon gina atake sang mga dumuluong nga pungsod./PT

MILITAR NI DUTERTE, WALA-UNTAT ANG ATAKE SA PROGRESIBO NGA GRUPO; ANAY AKTIBISTA SA PANAY, PINAKAULIHI NGA GINPRESENTAR NGA STAR WITNESS

[EDITED]

SYUDAD SANG ILOILO – Bangud sang wala-tuo nga pagpanagang ni Lt. Gen. Antonio Parlade halin sa mga artista, kritiko, miyembro sang oposisyon kag progresibo nga grupo batuk sa iya pataka nga redtagging, napilitan ang kampo sang militar nga ipakilala ang ila kuno star witness nga makapamatuod sang kaangtanan sang CPP-NPA-NDF sa mga legal kag progresibo nga grupo.

Nagwa sa publiko kahapon nga adlaw si Jeffrey Celiz nga nauna nagpakilala nga Eric Almendras agud pamatud-an kag susugan ang akusasyon sang militar nga kuno mga katapo sang CPP-NPA-NDF ang ara sa likod sang Makabayan Bloc, Bayan kag mga sectoral groups.

Si Celiz ang anay aktibista halin sa pamatan-on estudyante kag nangin chairperson kag spokesperson sang Bayan Panay. Apang sang tuig 2005, naghalin ini sa grupo kag nangin tinawo sang mga kilala nga pulitiko kaangay nanday Raul Gonzalez kag Jed Patrick Mabilog. Pagpungko ni Duterte sa poder, isa si Celiz sa ginpangalanan sini sa iya narcolist kag umpisa sadto nadula na si Celiz sa mata sang publiko. Sining damlag lang liwat nagtuhaw nga ara na sya sa paghinakop sang militar sa idalum sang secretariat sang NTF-ELCAC.

Para sa Bayan Panay, matapos naghalin sa ila grupo si Celiz, nagpagamit na ini sa kon kay sin-o man para luwason ang iya kaugalingon kag sa proseso gin-traidoran sini ang mga naggamit sa iya. Gapati ang Bayan Panay nga ang pagpagamit ni Celiz bilang whistleblower sang AFP isa ka desperado nga tikang agud salbaron ang iya kabuhi matapos siya ginbutang sa narcolist ni Duterte.

Nagapati ang Bayan Panay nga kinamatarung sang pumuluyo nga magpalayag sang iya disgusto sa gubyerno kag magdemanda para sa ila kaayuhan. Ang ini nga kinamatarung nagpagkit sa konstitusyon.

Gina-athag man sang Bayan nga imbes nga redtagging kag pagpakalain sa ila kubay, dapat tutukan sang gobyerno ang paglubad sang ugat sang kaimulon kag kapigaduhon nga amo ang nagaduso sa pumuluyo nga magbato kag sa iban nga indibidwal ginpili ang armado nga paghimakas.

Nagapati naman ang Bayan nga ini nga tikang sang militar kabahin sang ila kaugot matapos mabuyagyag nga wala gali sang liquidation ang ila pondo sa NTF-ELCAC kag nabuyagyag ang P19 bilyon nga budget nila nga ginbansagan nga “general’s pork” nga ginakampanya subong nga sayluhon sa social services agud mapuslan sang pumuluyo.

Sa esensya, ang bira sang militar kag ni Celiz sa progresibo nga grupo dugang sang Bayan kabahin sang crackdown sang Duterte administration sa mga kritiko sini gamit ang Anti-Terrorism Law.

Ginhangkat sang Bayan ang militar kag si Celiz nga kon nagapati sila sa ila mga kabutigan, mag-file sila sang kaso sa korte agud mapamatbatan, nga kaangay sang masami nga gina-ubra sang militar kag kapulisan, wala basehan, puro kabutigan kag ginabasura sang korte ang ini nga mga kaso./PT