By SYUDAD SANG ILOILO – Ginkundena ni Makabayan senatorial bet Cong. Neri Colmenares ang padayon nga militarisasyon kag okupasyon sang Tsina sa West Philippine Sea sang damlag lang.
Suno sa mga reports, gin-ukopar sang Tsina ang tradisyunal nga palangisdaan sang mga Pilipino nga Quirino Atoll, malapit sa Palawan, nga sulod sa 200 nautical miles nga exclusive economic zone nga ginapanag-iyahan sang Pilipinas.
Suno kay Cong. Colmenares, acto sang padayon nga gyera kag pag-agaw sang teritoryo ang ginapakita sang Tsina samtang padayon pa nga ginadesisyunan ang isyu sa The Hague Arbitral Court sa the Netherlands.
Dugang pa ni Cong. Colmenares, dapat untaton sang Tsina ang ini nga lihok bangud ginapalala sini ang tension sa rehiyon sa diin apektado ang mga mangisngisda halin sa Palawan, Southern Luzon, Manila kag Kabisayaan.
Kabutigan man suno kay Cong. Colmenares nga buligan kita sang Estados Unidos bangud klaro nga wala ini may ginbuhat kag gingamit lang ang tension sa West Philippine Sea para mapirmahan ang Enhanced Defense Cooperation Agreement ukon EDCA para sa padayon nga dominasyon sang pwersa militar sini sa pungsod kag South East Asia./DK
