Browsing Tag

Kabataan Partylist

MGA PROGRESIBO NGA GRUPO, GIN-ATUBANG ANG MGA ALEGASYON SA ILA SA SENATE HEARING TUHOY SA RED-TAGGING

SYUDAD SANG ILOILO – Gin-atubang sang mga progresibo nga grupo ang mga opisyal sang militar kag katapo sang National Task Force to End Local Communist Armed Conflict ukon NTF-ELCAC kag ila mga witnesses sa ikaduha nga session sang senate hearing tuhoy sa issue sag red-tagging sang mga personalidad kag organisasyon nga ginahimo sang militar.

Gintambungan sang Makabayan Bloc ang nasambit nga senate hearing sa pagpanguna nanday Bayan Muna Representative Carlos Zarate kag Kabataan Partylist Representative Sarah Elago. Nagtambong man sanday anay Bayan Muna Representative Atty. Neri Colmenares kag Teddy Casino. Yara man ang mga representante sang Karapatan, Gabrilea, mga himata sang ginpamatay sa idalum sang rehimen ni Duterte kag subong man si Sr. Mary John Mananzan.

Sa pihak naman nga kampo amo sanday National Security Adviser Hermogenes Esperon Jr. kag pila ka mga opisyal sang NTF-ELCAC nga nagpanginwala nga may kahilabtanan sila sa red-tagging.

Nagpa-andam si Casino nga ang red-tagging nga gina-ubra sang mga militar kag kapulisan ang embukada sang mas malala nga crackdown batuk sa mga kritiko sang gobyerno gamit ang Anti-Terror Law.

Dugang pa ni Casino, ang ini nga mga asud-asud nga propaganda sa red-tagging ang may tinutuyo nga buyukon ang opinion publiko batuk sa mga progresibo bilang preparasyon sa pagdesignar ukon pagproscribe sa ila bilang mga terrorista sa ngalan sang Anti-Terror Law kag ang lubos na nga pagtukod ni Duterte sang iya tiraniko nga paghari paagi sa pagkriminalisa sang nagapamatuk sa iya indi maayo nga pagdumala.

Gin-athag naman ni Casino nga indi sila kabahin sang underground nga kahublagan. Suno kay Casino, wala sila sang ginahimo nga illegal. Ginhangkat niya liwat ang NTF-ELCAC nga kung may ara sila sang pamatuod dapat nagderetso sila sa korte.

Apang wala man sang plano ang NTF-ELCAC nga dal-on ini sa korte suno kay Casino bangud nakahibalo ang mga militar nga indi sila mangin madinalag-on basi mismo sa panugdaon sang ila star witness nga indi makatindog ang ila akusasyon sa korte gani ginagamit nila ang senado para iduso ang trial by publicity batok sa mga progresibo nga grupo.

Para naman ipakita nga wala sila sang ginahimo nga malain, ginpresentar sang mga progresibo nga grupo kag Makabayan Bloc ang ila nga mga kontribusyon kag hinimuan agud magduso sang kaayuhan sa katilingban.

Pila sa mga layi nga napasar nga principal ginduso sang Makabayan amo ang Universal Free Higher Education Act, Free Irrigation Services Act of 2018, Reorganizing and Strengthening the Public Attorney’s Office Act, Anti-Trafficking in Persons Act, Free Public Wi-Fi Law, National Student’s Day, Expanded maternity leave law, Kalusugan at Nutrisyon ng Mag-Nanay Act, Filipino Sign Language Act kag madamo pa.

Nag-apelar si Casino sa publiko kag sa senado nga untaton na kag imbestigahan ang madata nga kaso sang red-tagging bangud nga madamo na ini sang ginkuha nga kabuhi kaangay nanday Randal Echanis, Zara Alvarez, Jory Porquia, Atty. Ben Ramos kag madamo pa./PT

REDTAGGING SA MGA ESKWELAHAN, GINKUNDENA SANG MGA PROGRESIBO

SYUDAD SANG ILOILO – Ginkundena sang Kabataan Partylist – Panay ang panibag-o nga redtagging sang militar sa mga eskwelahan sa Iloilo.

Sa pahayag sang Philippine Army, ila daw ginamonitor ang mga estudyante sa mga eskwelahan nga ginsambit ni “Ka Eric” ukon mas kilala nga Jeffrey Celiz kung sa diin may mga progresibo nga grupo nga may kaangtanan sa CPP-NPA-NDF.

Ginpahayag sang grupo nga ang pag redtag sa ila mga miembro kag mga estudyante ang naga butang sa katalagman sang ila seguridad bangod antes ginpatay sanday Jory Porquia kag Zara Alvarez, sila ang ginredtag kag gin monitor man sang mga ahente sang estado.

Dugang sang grupo nga ang pagredtag sa mga kritikal mga organisasyon sang estudyante ang nagahatag sang lisensya sa pag atake sa sini nga mga organisasyon, ila mga lider kag mga miembro. Ginahatagan man sini sang ligwa agud ma-militarisa ang mga eskwelahan kung sa diin may ara sang mga organisasyon nga kritikal sa gobyerno. Ini magaresulta sa pag-ipit sa mga organisasyon kag pagbusal sa mga kritiko nga athag nga bayolasyon sa duna nga kinamatarung sang mga estudyante sa pagpalayag kag organisasyon.

Luyag man sang grupo nga ipahanumdom sa militar nga ang pagmonitor nila sa mga eskwelahan ang naga bayolar sang layi nga RA 7610 kung sa diin gina kabig ang mga eskwelahan nga mga zones of peace kag gina dumilian ang presensya sang mga armado nga hubon.

Ginpakamalaut man sang Kabataan Partylist ang redtagging nga natabo sa NSTP program sang West Visayas State University – Pototan Campus kung diin gin redtag nila ang MAKABAYAN Bloc nga mga “legal fronts” kuno sang CPP-NPA-NDF.

Dugang sang grupo nga ang Makabayan Bloc, kung diin kabahin diri ang Kabataan Partylist, ang nagapakigbato sang kinamatarong sang pumuluyo para sa edukasyon, mga basehan nga serbisyo sosyal, trabaho kag insakto nga sweldo, kag matuod nga repormang agraryo. Dugang sang grupo nga ang pagdepensa kag pakigbato sang kinamatarong sang pumuluyo ang indi krimen.

Santo sa Section 18, numero 1, sang Article 3 Bill of Rights sang 1987 Constitution, indi dapat mapreso ang isa ka tawo bangud lang sang iya political nga pagpati kag handum nga mangin hilway sa pagpamigos kag pagpanghimulos ang sosyodad kag may pag-alalangay. Gani nanawagan ang Kabataan Partylist kag iban pa nga mga progresibo nga organisasyon sang mga pamatan-on nga untaton ang redtagging kag indi pagpahanugotan nga gamiton ang mga buluthoan nga avenue sa pag redtag, kundi sa pag hulma sang mga kritikal nga paminsaron.

Ginhangkat man sang grupo nga imbes i-monitor sang Philippine Army ang mga buluthoan, mas maayo kung didto sila ma monitor sa West Philippine Sea nga padayon gina atake sang mga dumuluong nga pungsod./PT

MGA PROGRESIBO NGA GRUPO KAG MAKABAYAN BLOC, GILAYON NGA NAGHATAG SANG BULIG SA MGA BIKTIMA SANG BAGYONG ULYSSES

SYUDAD SANG ILOILO – Wala sang may gin-usik nga tiyempo ang nagkalain-lain nga organisasyon halin sa mga progresibo nga grupo kaupod ang Makabayan Bloc agud gilayon nga makapalab-ot sang bulig para sa mga biktima sang Bagyong Ulysses.

Samtang nagahulat ang tanan nga pumuluyo sa panugyan kag aksyon sang gobyerno nasyunal nakaset-up na sang mga community kitchens kag nagdul-ong na sang bulig ang mga progresibo nga grupo sa mga lugar nga pwede na ma-access sa diin nagsubside na ang tubig baha.

Gilayon nga nakaset up sang community kitchen ang Bayan Muna Partylist sa idalom sang ila nga Bayang Matulungin Initiative sa Baranggay Tatalon, Riverside, kag Talayan sa Quezon City kag Baranggay San Jose naman sa Rodriguez Rizal.

Nagpanagatag naman sang mainit nga pagkaon ang Anakpawis Partylist sa mga evacuees sa Baranggay Barangka National High School sa Marikina.

Nagpreparar naman ang Karapatan sang linaga nga itlog kag kan-on para sa 500 ka tao sa Sampaloc, Manila.

Nanagtag man sang pagkaon para sa 73 ka pamilya ang Kilusang Mayo uno sa mga evacuees sa San Isidro Labrador Parish sa Baranggay Bagong Silangan, Quezon City.

Nagpack naman sang  relief goods ang Tulong Kabataan upod ni Kabataan Partylist Representative Sarah Elago para ipanagtag sa mga apektado nga pamilya.

Nagapadayon sa pagpangalap sang pondo kag resorsa ang ini nga mga grupo agud mapadayon pa ang paghatag sang bulig sa mga apektado nga pumuluyo.

Sa Panay, ginlunsar sang Bagong Alyansang Makabayan ang Bangon Bayan Campaign agud magtipon sang bulig para sa nga biktima sang Bagyong Ulysses. Mga pamatan-on, sa pagpanguna sang Tulong Kabataan Western Visayas, naglunsar man sang donation drive para sa mga naapektuhan sang nasambit nga bagyo.

Wala naman kaluwas sa kritisismo halin sa pumuluyo ang gobyerno nasyunal kag si Presidente Duterte bangud wala sang klaro nga direksyon halin sa iya sa paglaslas sang Bagyong Ulysses. Kaangay sang paglaslas sang Bagyong Rolly liwat nga nagtrending ang #NasaanAngPangulo sa social media senyales sang pagkadismaya sang pumuluyo sa kawad-on sang aksyon halin kay Duterte kag sa gobyerno nasyunal.

Sa subong nagapanukot na ang pumuluyo sang salabton sang gobyerno nasyunal tuga sang iya kapabayaan nga nagtuga sang sini nga kalalat-an./PT

MGA MAMALIDHA, GINAPA-AUDIT ANG PONDO SANG NTF-ELCAC

SYUDAD SANG ILOILO – Ginaduso subong ni Senate Minority Leader Franklin Drilon nga bantayan sang hugot sang Commission on Audit ang paggasto sang pondo sang National Task Force to End Local Communist Armed Conflict.

Ini matapos nga ginbukas ni COA Chairman Michael Aguinaldo ang posibilidad sang pagtukod nila sang espesyal nga team sa pag-audit sang pondo sang NTF-ELCAC bilang sabat sa request sang pila ka mga kongresista.

Matandaan nga sang Agosto ginsulatan ni Bayan Muna Representative Carlos Zarate si Chairman Aguinaldo nga bantayan ang multi-bilyon nga pondo sang NTF-ELCAC bangud kwestiyonable ang legalidad sini.

Sa pahayag ni Drilon, iya ginasuportahan ang special audit sang pondo sa NTF-ELCAC ilabi sa subong nga panahon nga madamo sang isyu sang korapsyon ang nagakahublasan.

Dugang pa niya nga dapat banatayan ang bag-o nga programa sang NTF-ELCAC nga baranggay development program ilabi pa nga dako ang posiblidad nga sudlan ini sang politika kag gamiton para sa 2022 presidential elections.

Sa P19 bilyon nga pondo sang NTF-ELCAC para sa 2021, P16 bilyon sini ang ila gintalana para sa barangay development project.

Apang suno sa Makabayan Bloc, kwestyonable ang ini nga pondo kag dapat kakason bangud isa ini ka pork barrel.

Ginapawagan sang Makabayan ang pagrechannel sang sini nga pondo bangud nga indi ini itemized ukon wala natalana ang espisipiko nga pagagastuhan sini kag nagapabilin nga ang may kontrol kung paano ini gastuhan ang nakasandig lamang sa pipila ka tao kaangay sang presidente kag sang mga opisyal sang militar kag NTF-ELCAC.

Gilayon man nga ginpanginwala ni DILG Secretary Eduardo Ano nga isa ini ka pork barrel kag ginhambal nga pagagamiton ini sa paghatag sang serbisyo sa mga baranggay nga ila ginakabig mabaskug ang impluswensiya sang insurhensya.

Apang suno kay Kabataan Partylist Representative Sarah Elago, gin-ako ni Sec. Ano nga sa proseso pa lang ang pag-itemize sang pagagastuhan sang ini nga pondo gani makabig ini sa gihapon nga unitemized sa subong.

Dugang pa niya nga indi matuod nga gamiton ang ini nga pondo para sa paghatag sang mga serbisyo sa mga kabaranggayan bangud nga ang tuyo sang NTF-ELCAC kag DILG amo ang magahatag sang reward sa ila ideklara nga insurgenct-free barangays sa diin mahimo ini nga gatasan sang pondo ilabi sa subong nga madamo ang kaso sang peke nga pagpasurender agud pagwaon nga madinalag-on ang kampanya sang gobyerno kontra insurhensya./PT