By Subong nga episode sang Dampig Katarungan, gintalakay ang mga mainit nga isyu sang balikbayan boxes, K-12 program kag ang nagahilapit nga APEC meeting on Blue Economy kag Food security.
Sa aton nga mga natalakay nga isyu subong nga hapon, halin sa balikbayan boxes,K-12 nga sistemang edukasyon kag ang “Blue Economy” o ekonomiya ng pagpangisda para sa kasegurohan sa pagkaon , nagapakita lang nga ang gobyerno ni Aquino mapintas nga ginabakol ang pumuluyong Pilipino sang iya mga programa o layi nga makamamatay.
Ginpakita man sang mga nagkalain lain nga estorya sang aton mga bisita ang ila tingub nga pagbato para madampigan ang ila mga duna nga kinamatarung. Napamatud-an nga may mga kadalag-an kita nga maagom, kaangay sa pag pauntat sang balikbayan boxes inspection.
Matuod nga sa masami indi kompleto nga kadalag-an sa pagdula sang mga mapintas nga layi apang dako na nga kadalag an ang mga una nga tikang sa pagpaatras sang gobyerno. Sa padayon nga pagbato, amat amat naton nga mabag-o ang kahimtangan pabor sa malapad nga pumuluyo.
Sa pag-angkon sang lubos nga pagbasura sang mga kontra pumuluyo nga layi. Inspirasyon naton ang mga paghulag nga wala sang kahadlok sa pag dampig sang aton mga kinamatarung.
