Lihok nga paghatag bonus sa mga ehekutibo sang SSS, gintawag nga imoral ni Cong. Colmenares

SYUDAD SANG ILOILO – IMORAL! Ina ang reaksyon ni Cong. Neri Colmenares sa plano sang SSS nga maghatag sang performance bonus sa mga ehekutibo sini matapos punggan ang dos mil nga saka sa pension sang mga senior citizens.

Suno kay SSS president Emilio de Quiros, nag-improbar ang costumer service kag kita sang kumpanya kag nagtaas ang collection sini sang 10 porsyento sang nagligad nga tuig.

May ara ang SSS sang 445 bilyon pesos nga pondo kag nagsaka ang income sini sang nagligad tuig sa 35 bilyones pesos kumpara sa osto bilyones pesos sadtong 2010 suno kay de Quiros.

Apang ginpamatukan ini sang mga pensioner bangud sa palpak guihapon nga serbisyo kag dalagkuan nga sweldo sang mga opisyal sini.

Sa maksimum, makabaton ang mga opisyales kag empleyado sang SSS sang bonus sa kantidad nga duha kag tunga sa bulan sang ila sweldo.

Ginhangkat ni Cong. Colmenares ang mga pensioners nga pamatukan ang hagna nga ini sang SSS kag padayon nga iduso ang dos mil nga saka sa pensyon sang mga senior citizens./DK