By SYUDAD ng Iloilo – Masobra 3000 ka mga punsudnon nga minorya kag moro halin sa nagkalain-lain nga bahin sang pungsod ang naglakbayan padulong sa Metro Manila para ibuyagyag kag pakigbatuan ang nagalala nga atake sang rehimeng US-Duterte sa ila, subong man ang pagdambong sang ila teritoryo kag ancestral domain.
Kabahin sang Lakbayan 2017 amu ang mga Lumad sa Mindanao, Tumanduk sang Panay, Mangyan sang Mindoro, Dumagat sang Quezon kag Rizal, Aeta sang Central Luzon, Agta sang Cagayan Valley kag mga minorya sang Cordillera. Gin updan man ini sang mga bakwit nga moro nga naghalin sa Marawi City
Suno kay Datu Jerome Succor Aba, Sandugo co-chairperson, nag-atras na si Duterte sa iya promisa nga protektahan ang mga punsodnon nga minorya. Ginapadayon sang rehimeng US-Duterte ang mga polisya kag patakaran nga kontra-pungsodnon nga minorya.
Suno naman kay Marivic Aguirre, Chairperson sang Tumanduk, labi na gid nagabangis si Duterte kag nahublasan na ang kontra-pumuluyo kag pungsudnon minorya sini nga pagdumalahan. Suno man sa iya, palareho lamang ang problema sang mga pungsudnon nga minorya sa Pilipinas katulad sang militarisasyon sa kaumhan kag pagpapatuman o pagtukod sang proyekto nga nagaguba sang palangabuhian kag panimalay sa ila ancestral domain
Samtang yara sa Metro Manila, naghiwat sang pila ka protesta ang mga pungsudnon nga minorya. Sang Septeymbre 6, nagprotesta ang mga minorya kag moro sa atubang sang Sofitel Hotel kung sa diin nagapulong ang mga myembro sang chamber of mines.
Sang Septembre 7, nagprotesta sila sa atubang sang Camp Aguinaldo sa pagkondena kag papapanukot sa pagpalapas sang tawhanon nga kinamatarong sang mga militar sa kaumhan. Sa pareho man nga adlaw, nagprotesta ang mga minorya sa NCIP tungod sa kainutilan sini. Ang Lakbayan 2017 magatakop sa Sept 21, sa pagkomemorar sang Martial law ni Marcos. (Dampig Katarungan)
