By SYUDAD sang Iloilo – Sa tunga sang wala-tuo nga pagpamatay, harassment, dislokasyon kag iban pa guid nga porma sang paglapas sang tawhanon nga kinamatarung sa idalom sang rehimeng US-Duterte, nanawagan ang grupo nga Anakbayan-Panay nga dapat paslawon sang pamatan-on kag pumuluyo ang pasista nga atake sang rehimeng US-Duterte nga gintuga sang sang giyera kontra droga, giyera konta moro kag all-out war batok sa pumuluyo nga ginalunsar sini.
Suno kay Anakbayan Panay Chairperson Bryan Bosque, sunod-sunod nga nagdanak ang dugo sa idalom sang pagdumalahan ni Duterte kag dapat pangunahan sang pamatan-on kag estudyante ang kahublagan para pasabton si Duterte kag ang mga tinawo sini sa sunod-sunod nga pagpamatay sa hanay sang pamatan-on kag sang pumuluyo.
Kabahin sa mga pinaka-ulihi nga biktima sang human rights violation sa idalom sang rehimeng US-Duterte amo ang 17 anyos nga si Kian delos Santos, 19 anyos nga si Carl Angelo Arnaiz kag ang 14 anyos nga si Reynaldo de Guzman, mga lunsay biktima sang pagpatay kag torture sa ngalan sang giyera kontra droga samtang patay naman ang 19 anyos nga lumad nga si Obillo Bay-ao matapos nga matiruhan sang CAFGU sa Talaingod, Davao del Norte.
Dugang pa ni Bosque, indi na dapat pa nga hulaton sang pamatan-on nga magdamo ang mabiktima sa hanay sini antes nga maghulag.
Suno sa iya, kung maghipos lang ang mga pamatan-on magapadayon ang pagsabwag sang kalakasan sang rehimeng US-Duterte kag pwede nga mabiktima ang bisan sin-o lang gani wala na sang iban pa nga pilian ang hanay sang pamatan-on kundi nga magbato para mabuyagyag ang mga sala sang sini nga rehimen kag para mapunggan ang padayon nga pagdata sang paglapas sang tawhanon nga kinamatarung.
Nanawagan naman ang Anakbayan-Panay sa mga pamatan-on kag pumuluyo nga magtukod sang pinakamalapad nga alyansa kag maglunsar sang dalagkuan nga mga protesta para ibuyagyag kag hublasan ang mga kontra pumuluyo nga polisiya sang rehimeng US-Duterte kalakip na ang tatlo ka giyera nga ginalunsar sini. (Dampig Katarungan)
