By Gosos kay Señor Santo Mayor de Iloilo
■ binaylaybay ni Simeon de Leon
“Hala Bira! Pwera Pasma!”
Sa nawas-ag kwarta-nga-buhis sa tisa nga
dalan sang S’yudad
(…para qué?)
“Hala Bira! Pwera Pasma!”
Sa mga kinse-traynta, mga debotante,
este, botante-de-botete sa City Hall
(…para què?)
“Hala! Bira! Pwera Pasma!”
Sa kondenado nga kalag sang pinamatay
nga palangabuhian sa mga katawhan sa
Merkado
(…para què?)
Oy, Señor Santo Mayor, ayuda me sang
imo mahagpok nga “Linte!” kag
“Yudifutah!”
Ikaw nga labing mataas, ikaw nga labing
matina-asta-ason.
Ikaw ang labing gamhanan nga Juez de
Cuchillo de la Muy Noble y Leal Ciudad de
Iloilo.
“Hala Bira!” “Sigue dasok bisan gutok!”
Sang binira mo ang Demokrasya kaupod
ang Duque la Energia agud magpili sang
Prensesita.
“Hala Bira!” “Sigue dasok bisan gutok!”
Sanglit imo ang labaw bugal nga familya —
Patron Medici sa S’yudad sang kung ano-
ano nga Kaartihan.
“Hala Bira!” “Sigue dasok bisan gutok!”
Sanglit manamit nga ginhandus mo ang
Kinamatarong sa Pagpahayag sang imo
matalum nga Tiraniya.
Malooy ikaw Santo Mayor nga
mahinatagon sang papay nga dayon . . .
Grasyahi kami sang kupos nga Pan-de-Sal;
Kaloy-i kami sang lampayat nga Bicocho;
Bugay-i kami sang may burak nga Mamon.
Ikaw nga labing mataas, ikaw nga labing
matina-asta-ason.
Ikaw ang labing gamhanan nga Juez de
Cuchillo de la Muy Noble y Leal Ciudad de
Iloilo.
——————————————-
*Dibuho ni PG Zoluaga
‘Deliver Us From Extinction’
6 x 6 feet
Acrylic on canvas
2002
