By Binalaybay ni Tomas Talledo
Wala sa pilak, gahum, kabantugon,
kundi ara sa pagbaliskad-paya sang
mga agalon nga daluk kag mapiguson
Ara ang paglaum sa baba sang luthang ang
hangkat sang Signosang Bakunawa
samtang wala pa ang bugana nga kabuhi sa
binukid, patag kag tayuyon nga suba
Pangitaon agud masapwan ang hustisya katulad
sang pagkasapo sa wasak nga
dughan sang gindingutan sang tiraniya
Maghimakas agud mabungkag ang kagarukan,
wasakon kun ara sa dapog,
sa papag, sa bangerahan kag sa hagdan
Agud mahakos ang katam-is sang kasubo,
mananaman ang kasakit kag kanunay matapos
ang dinag-on nga pag-antos
Kay ara na ang mga labaw dunggon nga
hangaway, mga nagakubay nga paglaum, mga
labing hamili nga inanak sang pigos.
/8 Pebrero 2024
