By TURAGSOY sa “Buwan ng Wika”
Binalaybay ni Tomas Talledo
I.
Sa tampuhaw, mahapdi ang labtik sang kaugalingon nga pulong. Matuyomtuyom ang labhag sa gaburad-ad nga taghipusuon. Kay nahublasan ang binutig sa kaugalingon.
Sa kamadugay ang pagkahamulag sa kaugalingon nga pulong, ang yadtong inanak sang Iloy-nga-Dila nangin banyaga. Nagsalalapid ang mga tinaga sang saguè Tagalég kay kuno taga Maynila. Ay sa tampalasan! Ay wala’y huya!
May kahang nga mananam mitlangon ang kaugalingon nga pulong. Ang kaamyon matalum pa sa buskag sang kugon. Kon dili mo matungkad ina kay ikaw ara sa tabtaban. Ahay kaluoy, ahay kanugon!
Nalipatan ang dugos sang natawhan nga duta kay nakapisik sa kapait sang manunggal sa dila. Basa pa gani gatas ang iya baba, nalumos na sa sabaw sang binutig kag dinayá. Ahay sa kaluoy, ahay kanugon!
# # #
